Китаплар китабы

 

22 октябрь көнне Татарстан Фәннәр академиясендә, Татар энциклопедиясенең татарча беренче томы дөнья күрү уңаеннан, тәкъдим итү тантанасы булды.
- Хәзерге вакытта өстәлемдә урыс телендә бастырылучы энциклопедиянең IV томы ята. Инде менә татарча варианты да чыга башлады. Бу гадәти генә тәрҗемә түгел. Урыс телендәге варианты нигезендә эшләнсә дә, ул шактый үзгәргән, тулыландырылган, аңа 300 дән артык яңа мәгълүмат кергән (китапта 3860 мәкалә, 1200 иллюстрация бар), - дип бу хезмәткә зур бәя бирде академик Миркасыйм Госманов. Шагыйрь Равил Фәйзуллин исә, әгәр мөмкинлек бирелсә, милләтнең мондый хезмәте 50 ел элек дөнья күргән булыр иде. Бу энциклопедиясез без ничек яшәдек икән?! Ни кызганыч, I том ике мең данә генә нәшер ителгән. 8 миллионлы халкыбыз өчен бик аз бу, - дип әлеге гыйльми хезмәтне тагын да күбрәк бастырып тарату зарурлыгын күтәрде. Тантана барышында башка эшлекле тәкъдимнәр дә яңгырады. Әйтик, җаваплылыкны арттыру максатында, һәр мәкалә авторының исем-фамилиясен күрсәтергә, мәктәпләрдә Белем көнен шушы энциклопедияне күрсәтүдән башларга, дигән киңәшәләр бик урынлы, безнеңчә.
Тантана ахырында, бик яхшы сыйфатлы китап бастырып куандырганы өчен, ТФА президенты Әхмәт Мазһаров «Идел-Пресс» нәшрияты генераль директоры Ислам Әхмәтҗановка академиянең Рәхмәт хатын тапшырды, ниятләнгән алты томлыкны үзебез исән чакта чыгарып, шушы залда тәкъдим итәргә язсын иде, дип теләк теләде.

Рәшит МИНҺАҖ

«Ватаным Татарстан»